ដោយ សាវយុត
2009-06-03
ក្រុម អ្នកជំនាញខាងការងាររៀបចំដាក់អំពូលភ្លើងបំភ្លឺជញ្ជាំងនិងកំពូល ប្រាសាទអង្គរវត្តបានទទួលស្គាល់ថា អំពូលភ្លើងដែលគេដាក់នោះគឺខុសប្រភេទហើយគ្រាន់តែជាការរៀបចំ សម្រាប់សាកល្បងប៉ុណ្ណោះ ហើយគេនឹងដកចេញវិញ។
ក្រុមការងារដែលដាក់រាយអំពូលភ្លើងអគ្គិសនីនៅតាមជញ្ជាំងនិង បាញ់បំភ្លឺកំពូលប្រាសាទអង្គរវត្តនាពេលយប់បានឲ្យដឹងថា ប្រភេទអំពូលភ្លើងអគ្គិសនីដែលដាក់ក្នុងប្រាសាទបំភ្លឺផ្ទាំងចម្លាក់ និងភ្លើងហ្វាដែលតដោយបណ្តាញថាមពលខ្សែភ្លើងរញេរញ៉ៃធ្វើឲ្យមាន ការរិះគន់និងប្រតិកម្មពីមហាជននោះនឹងដកចេញវិញនៅពេលខាងមុខ ដោយសារតែការដាក់អំពូលភ្លើងទាំងនោះគ្រាន់តែជាការសិក្សាពិសោធន៍ ប៉ុណ្ណោះ។
លោក Ahmed Bennis ដែលមន្ត្រីរដ្ឋាភិបាលខ្មែរតែងអះអាងថាជាអ្នកជំនាញផ្នែកពន្លឺនិង តាក់តែងភ្លើងនៅតំបន់អង្គរវត្ត បានមានប្រសាសន៍ក្នុងសន្និសីទកាសែតមួយខណៈដែលមន្ត្រីរដ្ឋាភិបាល ខ្មែរនិងអ្នកជំនាញអង្គការយូណេស្កូកំពុងជួបប្រជុំនៅក្នុងសណ្ឋាគារ សុខាកាលពីព្រឹកថ្ងៃទីពុធ ទី៣ ខែមិថុនា ថាការដាក់អំពូលភ្លើងហ្វាបំភ្លឺរូបចម្លាក់តាមជញ្ជាំងនិងបាញ់ បំភ្លឺកំពូលប្រាសាទអង្គរវត្តពេលយប់ដោយប្រើខ្សែភ្លើងយកថាមពល អគ្គិសនីមកប្រើប្រាស់នោះគឺវាបានខុសលំនាំរួចស្រេចទៅហើយ ក៏ប៉ុន្តែវាមិនមែនការរៀបចំពិតប្រាកដទេ វាគ្រាន់តែជាការរៀបចំបណ្តោះអាសន្នដើម្បីពិសោធបង្ហាញឲ្យក្រុម អ្នកជំនាញមកពិនិត្យមើលរបៀបបច្ចេកទេសសម្រាប់អនាគតប៉ុណ្ណោះ ហើយអំពូលពិតប្រាកដសម្រាប់ដាក់ក្នុងប្រាសាទពេលយប់នោះនឹងរៀបចំ ថ្មីដោយគុណភាពយូរអង្វែងដោយមានតែពន្លឺដូចព្រះច័ន្ទមិនមានកម្ដៅ និងមិនមានកាំរស្មីពណ៌ស្វាយចាំងភ្នែកទេ ព្រមទាំងមិនប្រើប្រាស់ថាមពលអគ្គិសនីដើរដោយម៉ាស៊ីនផង គឺប្រើថាមពលពន្លឺព្រះអាទិត្យដែលរំពឹងថាពលរដ្ឋកម្ពុជានឹងសប្បាយ ចិត្ត។
លោក Ahmed Bennis បានមានប្រសាសន៍តាមរយៈអ្នកបកប្រែថា ៖ "អុបទិច... ដែលដាក់វាប្រើប្រាស់ប្រភពភ្លើងដែលប្រើខ្សែ ដូច្នេះវាខុសលំនាំរួចស្រេចទៅហើយ គាត់និយាយថា... នឹងរៀបចំថ្មី"។
ទោះយ៉ាងណា លោក Bennis មិនបានបញ្ជាក់ទេថា អំពូលដែលកំពុងដាក់បច្ចុប្បន្ននេះនឹងដកចេញពេលណាច្បាស់លាស់នៅឡើយទេ។
អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បានថ្លែងបញ្ជាក់ជាថ្មីថា ជុំវិញបញ្ហាដាក់អំពូលភ្លើងអគ្គិសនីនៅអង្គរវត្តដែលមានការចោទ ប្រកាន់ថាមានការដាប់ថ្មប្រាសាទគឺពុំពិតទេ ដោយលោកអះអាងថា ថ្មីៗនេះក្រុមការងារឯកទេសនៃគណៈកម្មការសម្របសម្រួលអន្តរជាតិបានទៅ ពិនិត្យរួចហើយមិនបានសម្ដែងការប្រឆាំងណាមួយទេ ចំណែកការដាក់ស្នៀតឈើបញ្ចូលទៅក្នុងប្រហោងថ្មទៀតសោតក៏បានដាក់ កៅស៊ូទ្រនាប់មិនឲ្យប៉ះពាល់ដល់ថ្មប្រាសាទដែរ។
ចំណែកអ្នកជំនាញស្ថាបត្យកម្មខ្មែរមួយរូបដែលមិនបញ្ចេញឈ្មោះនៅតែ សម្ដែងការព្រួយបារម្ភចំពោះការដាក់ភ្លើងបញ្ជាំងរូបចម្លាក់និង កំពូលប្រាសាទអង្គរពេលយប់នោះ ដោយលោកបញ្ជាក់ថា តាមការសិក្សាថ្មប្រាសាទបូរាណនេះនៅសល់ភាពរឹងមាំតែប្រមាណ៣៥% ប៉ុណ្ណោះ ៖ «ប្រសិនជាមានការដាក់ភ្លើងកម្ដៅខ្លាំងជះទៅលើតួប្រាសាទ អាយុកាលវានឹងកាន់តែបាត់បង់ទៅៗ»។
មន្ត្រីយូណេស្កូអន្តរជាតិប្រចាំកម្ពុជា លោក Teruo Jinnai មិនបានធ្វើការអធិប្បាយជុំវិញបញ្ហានោះទេ ដោយកាលពីល្ងាចថ្ងៃទី២ ខែមិថុនា លោកបានមានប្រសាសន៍ថា បញ្ហានោះជាការងារអ្នកជំនាញមួយក្រុមដែលគេបានទៅពិនិត្យរួចហើយ ប៉ុន្តែមិនទាន់និយាយអំពីបញ្ហានោះនៅឡើយទេ៕
0 comments:
Post a Comment